السلامة فالورش: القواعد اللي كتسالي بحياة

أغلب الحوادث الخطيرة فالورش ما كيوقعوش حيت الخدمة صعيبة. كيوقعو حيت واحد ستحق يربح خمس دقايق.

هادو القواعد اللي كيعرفوها كاع المهنيين، ومكتوبين هنا حيت حتّى حد ما كيقراهم بالعربية.

1. الطيحان من العلو

الطيحان هو السبب الأول ديال الموت فالبناء، فالمغرب وفكل بلاد.

• فوق 3 متر، الحزام واجب ومربوط فنقطة قوية — ماشي فأي حاجة
• السقالة خاصها تكون مربوطة بالحائط، وعندها حاجز
• ما تمشيش فوق لوح ما مربوطش
• السلّم للصعود والهبوط، ماشي باش تخدم عليه

2. الكاسك

الكاسك كيحمي من الطوبة اللي طايحة من فوق. طوبة من 10 متر كتوصل بسرعة تقتل.

لبسو حتّى إيلا كان سخون. الكاسك المكسور ولا اللي طاح عليه شي حاجة قوية خاصو يتبدّل.

3. الكهرباء

• ما تمسّش شي سلك مقطوع حتّى إيلا بان ميّت
• الخدمة قرب التوتر خاصها [تأهيل كهربائي](/blog/lwatha-iq-warsha-maghrib)
• الآلات فالبلايص المبلولة خاصها حماية
• إيلا شفتي شي حاجة خايبة، وقّف وعيّط للمسؤول

4. الحفر

الحفرة اللي فوق 1,30 متر خاصها تدعيم. التراب كيبان قاسح وكيطيح فثانية. بزّاف ديال العمّال ماتو مدفونين فحفرة "صغيرة".

5. الآليات

ما تمشيش وراء آلة كتخدم. السائق ما كيشوفكش. خلّي بينك وبين الآلة مسافة، وإيلا خاصك تقرب، صيفط ليه إشارة وتسنّى يجاوبك.

6. الغبرة والمواد

• الإسمنت كيحرق الجلد المبلول — لبس القفازات
• غبرة الحجر كتدخل للرية وكتبقى — لبس الكمامة فالقطع
• الضجيج ديال المطرقة كيقطع السمع بشوية — لبس واقي الأذنين

7. إيلا طلبو منك تخدم بلا معدات

هادي أصعب وحدة. المعدات ماشي هدية من المشغّل: هي واجب قانوني عليه. عندك الحق ترفض خدمة خطيرة بلا حماية.

فالعملي، إيلا حسّيتي راك ما قادرش ترفض، على الأقل:

• قول ليه بحضور ناس آخرين
• ما تخدمش بوحدك فبلاصة خطيرة
• ورش كيطلب منك تخاطر بحياتك على 150 درهم، ماشي ورش خاصك تبقى فيه

فخدّام كنشوفو العروض قبل النشر، وكنحيدو اللي كيخالف القانون. إيلا شفتي شي عرض فيه مشكل، عيّط لينا.

[شوف العروض](/emploi) · [الرخص والشهادات](/blog/lwatha-iq-warsha-maghrib)